Tongda turib uxlamagan oromidan nola qilar,
Duolarda ne so'rashin faqat o'zi, Tangri bilar.
Ko'zlar mungli, titroq qo'llar yostig'ini asta silar,
Bolasining orqasidan qolmasin Ona.

O'nta bo'lsa o'rni boshqa, o'xshatolmas donasiga,
Dasturxonda nonga emas, termular ostonasiga,
Tanho qolar suhbatlarda yo'latmay g'amxonasiga
Bolasining orqasidan qolmasin Ona.

Mexrin berib bir qismini olib qo'yar bolasiga,
Unutmaydi oq tushsa ham sochlarining orasiga,
Xijronlari parda solar ko'zlarining qorasiga,
Bolasining orqasidan qolmasin Ona.

Handon otib kulsa biling, yashiradi armonlarin,
Xo'rsinganda bulut qoplar bizga yorug' osmonlarin,
Uyalgandan yig'lar ajal, ko'rmayin deb bu onlarin,
Bolasining orqasidan qolmasin Ona.

Yo'q achinmang, yig'lab tursa, to'y qilsangiz mehmon bo'lib,
Qo'yib bering yig'lab olsin to'yib-to'yib, ko'ngli to'lib.
Yillar demang oily hakim, qolmadiku mexri o'lib,
Bolasining orqasidan qolmasin Ona.

She'rim yozib tirnab qo'ydim Ona qalbin, qildim gunoh,
Ona bo'zlab tursa yonda axir qaydan topay panoh?
Farzand dog'in ona uchun azob qilib berma Olloh,
Bolasining orqasidan qolmasin Ona!