Qaynar xumcha qaynamay qo’ygan,
Sehrlimas chiroqlar bugun.
Uchmay qolgan uchar gilamlar,
Shiroq emas shiroqlar bugun.

Oybarchinlar baxtiyor, xushnud:
Suluvlari boy, kiborlarni.
Alpomishlar qayta olmaydi:
Šazi bo’lgan boychiborlari.

Sanamlarga qiyos bo’lolmas –
Oy yuzida sonsiz chandiqlar.
Qasrlarda zanglab yotgandir
Tohirlari oqqan sandiqlar.

Bunday boqma!
Aldama meni…
Muhabbat – bu shunchaki ro’yo.
Butun emas ko’nglim ham manim
Ertaklardan uzilgan dunyo.

Naqadar sermazmun, baxsbop, salmoqli satrlar.....
Lekin, so'nggi satrlar meni yana munozaraga chorlaydi....
Ha, Oybarchinlar endi Alpomishlarni kutmaydi, Negaki Farhodlar ham tog'ni kesmay qoyganlar....
Faqat Muhabbat ro'yo emas, u bor, va hamisha qalbimizda. Faqat uni oshkor etishdan qo'rqamiz.
Ta'rixda bir narsa bor: Inson o'zi tushunmagan narsani rad etadi yoki ilohiylashtiradi. Siz Allohga muhabbatni tan olasiz, lekin insonga bo'lgan muhabbatni rad etasiz.
Satrlar, iltimos, rad etmang, toki har qanday muhabbatning yashashga haqqi bor.

Ertak derlar muhabbatni, deydilar ro'yo,
Muhabbatning hijronida bir yonmaganlar.
Yashayversin yodlab olgan haqiqatida
Ertaklarning rostligiga ishonmaganlar.

Suyagayman suymaganlarim,
Kuzga bahor bergim keladi.
Elga sochgum mehrimni, faqat,
Sizga ozor bergim keladi.

Yovlarimning menday do’sti yo’q,
Yaqinlarning kami-ko’sti yo’q,
Men bir telba, bitta esi yo’q,
Sizga ozor bergim keladi.

Daraxt bilan tillashgim kelar,
Gullar bilan dillashgim kelar,
Yuraklarga bo’ylashgim kelar,
Sizga ozor bergim keladi.

Tig’ – menday tig’, dor-chi – dor emas,
Jon zahm yetgan joyga dorimas,
Qaytay, sevgim el qatorimas,
Sizga ozor bergim keladi.

Goh Zulayho, goh Laylo bo’lib,
Goh xazin «oh», vovaylo bo’lib,
Holingizga achinib-kulib,
Sizga ozor bergim keladi.

Pinhon araz, yarashlar uchun,
G’amgin rashku talashlar uchun,
Ul beozor qarashlar uchun,
Sizga ozor bergim keladi.

Dildan sirlar sitilib ketsa,
Ko’zlar bilan manzilga yetsa…
Nima qilay rohat baxsh etsa...
Sizga ozor bergim keladi.

Balki siz ham o’ylarsiz bir bor,
Balki yo’qdir tilagingizda.
Sohiliga osilib olib
Bir qiz yig’lar yuragingizda.

Baxtingizday qora ko’zlari,
Sochingizday oppoq yuzlari,
Ketmas sim-sim og’riq izlari,
Bir qiz yig’lar yuragingizda.

Dardingizni may bilan yutmang,
Zardoblarning arishin kutmang,
Eplolmaysiz o’zni ovutmang,
Bir qiz yig’lar yuragingizda.

Taskiningiz – bu dunyo bir kam,
Kelaverar g’am ortidan g’am,
Sig’magaydir tushingizga ham,
Bir qiz yig’lar yuragingizda.

Menga o’xshab ketayaptimi?
Men – keraksiz keragingizga
O’zni qanday ataysiz baxtli –
Bir qiz yig’lar yuragingizda.

Bir qiz yig’lar yuragingizda…

Ko'z yoshlari tomirda oqqan,
Ko'zingizda dunyoga boqqan,
Sizdan boshqa hammaga yoqqan,
Bir qiz yig’lar yuragingizda.

Chidab turolmadim. Yana bir to'rtlik qo'shdim.
Meni kechirasiz degan umiddaman Mashhura...

Sen baxtlisan, avval aqling topib olding,
Men dunyoga kelgandayoq yo’qotganman.
Ko’ngling bilan apoq-chapoq bo’lib qolding,
Men dunyoga uni kelish-chun sotganman.

Sen kulganda, olam-jahon nurga to’lib,
Aksi sado har tomonga to’lar bo’lsa.
Tabassumdan nariga ham o’ta olmas,
Men o’zimcha qah-qah otib kular bo’lsam.

Dushmaning ham ishonadi gaplaringga,
Chun tinglaysan hatto toshning ohu zorin.
Yot u yot-ku hatto bugun ishlarimga
Shubha bilan qarab turar do’stu yorim.

Qayerdanam kelganman bu yot dunyoga
Bora-bora o’z-o’zimga bo’lyapman yov.
Sen o’zingni topmoq uchun kelgan bo’lsang,
Men o’zimni yo’qotmoqqa kelganmanov.

Sabrliroq bo’lsin iloyim,
Yana qattiq saqlasin sirrin.
Yo’li, dili pok bo’lsin doim,
Tilida bol, qo’llari shirin.

Erka bo’lsin hammadan ko’proq,
Mening telba fe’limni unut.
Yaralangan ko’nglingni emas,
Unga butun hayotingni tut.

Mendan ko’ra ko’proq cheksin dard,
Sening sevging, ishqing, rashkingda.
Menday dilda tortmasin azob,
Ardoqlansin, unsin ko’shkingda.

Epli bo’lsin ro’zg’oring haqqi,
Sepli bo’lsin, to’lsin uylaring.
Qolib ketsin ovora bo’lib,
Yetolmasin menga o’ylaring.

Asray bilsin seni har nedan,
Sadoqatda tengsiz bo’lsin to.
Rozidurman voz kechsang mendan
Ortiq bo’lsa topganing illo.

Mendan ming bor ortiq bo’lsin u,
Rozimasman ortiq bo’lmasa...

Faqat seni ko’rmasam bo’ldi
Uchratmasam nigohlaringni.
Gar duch kelsam ne qilay unga
Achishtirar qaboqlarimni.

Rad etdim-ku o’zimni qarg’ab
Senga qolsin jonbaxsh dalalar.
Aql bebosh yurakni tergab
Muhabbatdan, ishqdan saralar.

To’zg’itaman xayollaringni
Tushlaringga kirib damo-dam.
Yuragimning savollarini
Tugunchakdek tugib qo’yaman.

Ha, ketaman qishlog’imdan, bas
Ko’zlarimda marjon? Bu nechun?
Barchasini tashlab ketaman
Xayolingda yashamoq uchun.

Oqib tushar hislarim yupun
Kiprigimda muzdayin qotar.
Sayhonda bir o’tovdek yurak
Borlig’imda huvillab yotar.

She'r quyilib kelaverar begonalarga,
Doston bitib qo'ymoq oson janonanlarga,
Faqat bir so'z topolmayman durdonalarga.
Yozmaganman biror satr Opalarimga.....

(Haqiqatdan ham opalarim uchun mana shu to'rtlik SMSdan boshqa narsa yoza olmadim....)

Onajon, baxtingiz armonlaringiz
Yig’ilgan chashmingiz jolasiman men.
Mehribon, bag’rikeng, mo’min otamning
Bag’ritosh, fe’li tor bolasiman men.

Onajon, tunlari duolar qilib,
Iltijolar qilib topgan tilakman.
Mehnatkash qo’lingiz yorig’in ko’rib,
Nimta-nimta bo’lib ketgan yurakman.

Dunyoga keltirib nima topdingiz,
Sochingiz oqartgan ozorman, ona.
Dunyosi tinch qo’ysin dunyolaridan
Bezorman, bezorman, bezorman, ona.

Baxtim – baxtingizmi yo baxtsizligim
Millionlar ovozi, soziman, ona.
Agar baxtsizligim baxtingiz bo’lsa,
Mayli baxtingizga roziman, ona.